香港喜來登酒店的自助餐

前排去了喜來登食自助餐,好耐無黎了.應該有5年以上~價錢以尖咀和五星級酒店來講相對係便宜既(雖然呢個五星級可能係幾十年前既數據)~$538呢個價真係唔貴 

一開波例牌食海鮮冷盤,呢度有回本ITEM龍蝦,肉質略實,還好在有點鮮味~另外有呢種唔知咩蝦,蝦肉有點似瀨尿蝦,但有些不新鮮.生蠔就VERY GOOD啦,爽脆又夠濃味!但比我發掘到最好食既都唔係呢幾樣野~ 而係馬尼拉蜆!大大隻,勁甜,肉又彈牙,無沙,咩醬都唔洗就已經好鮮!無得頂~雖然唔係貴野,但係好食至上,食番一打先. 

另有剌身七款,鵝肝蟹腳都有~燒牛肉燒得好TENDER! 其他熟食就無咩邊款特別好食,法式薄餅火侯做得唔好千萬不要點~頭盤有個海膽豆腐夠清新,一濃一淡是絕配. 甜品無咩留意亦唔見有咩特色,生果有士多啤梨比較少有

咖啡廳 The Cafe 

地址:尖沙咀彌敦道20號香港喜來登酒店2樓 

電話:2369 1111 

價錢 午餐 (12:00-14:30) 

星期一至五 成人 $298 / 小童 $149 星期六,日及公眾假期 

成人 $368 / 小童 $184 

晚餐 供星期日至四: (18:30-22:00) 星期五,六,公眾假期及前夕: (18:30-21:30) 

星期日至四 成人 $538 / 小童 $269 

星期五,六,公眾假期及前夕 成人 $598 / 小童 $299

澳門星際酒店StarWorld Hotel Macau

今次簡左星際酒店,貪佢係澳門中心地帶,方便搵食!價錢比我最愛新濠鋒還要貴,呢度大約$1650HKD一晚,但始終係因為地段問題吧. 

CHECK IN時被告知只剩底一間為殘障人士而設既房,但其實都係廁所安裝了多些扶手而已,無咩大分別.相對上更安全,而且咁o岩我又係腦殘,所以無所謂. 房間空間十分大,好寬敞~絕對舒服!張床亦好大張!不過由於房間相對大,所以部電視就感覺上覺得唔夠大,睇得唔夠清楚.... 

其他設備都齊全.17樓有天際泳池,但係唔識游水,都係算吧啦....16樓有間品味坊,又係米豬蓮推介,都要試一下~ 質素係滿意,但定價略高

澳門星際酒店StarWorld Hotel Macau

地址:澳門友誼大馬路 

電話 : 853 28383838

港島香格里拉酒店Island Shangri-La Hong Kong的漪畔臺Waterside Terrace

白老鼠系列--之前朋友生日,我決定帶佢去一間一定可以包場既餐廳~就係港島香格里拉既漪畔臺Waterside Terrace,就係泳池旁既餐廳,最神奇係呢間野連服務員都唔知係邊. 

呢度係提供泰國菜既,亦可以欣賞泳客游泳.菜式都係大路野,其中一樣最抵食既就係羅望子汁炸魚,真係原條鱸魚炸比你,醬汁酸酸甜甜好開胃,又無咩骨啖啖肉!前菜煎魚餅十分彈牙,香矛味勁重又無覆蓋魚味,一流~~ 其他菠蘿炒飯,炒菜和蟹肉粟米湯無咩特別~

不過呢度又夠靜,服務員好好態度,所以食得好開心既. 全晚就只有3台客連埋我...最開心係聽到其中一個客人說(香港真是一個好地方),作為香港人,都希望每個人來香港都是愉快的.

漪畔臺 Waterside Terrace

地址:金鐘金鐘道88號太古廣場二座港島香格里拉酒店8樓

電話:2820 8580

澳門大倉酒店Hotel Okura Macau的和 大堂酒廊Nagomi Lobby Bar & Lounge

如果你想學下酒既知識,特別係日本酒和威士忌,一定要去大倉酒店既lounge,,因為在場有位哥哥(名字忘記了,就是在這裡的唯一一個男士),好專業又健談,好似咩都識咁.我係度磨2粒鐘,都係得我一個客,好爽快!

一杯野飲交下學費,唔算貴喔.佢推介我呢個新手飲最平那杯$60蚊,都幾好味,唔太苦,有少少煙燻味.一杯加冰一杯淨飲,差點番唔到屋企了.

雖然獲益良多,但係轉頭已經唔記得哂,金魚既記憶力就係咁上下....

和 大堂酒廊Nagomi Lobby Bar & Lounge

地址:路氹城澳門銀河綜合渡假城銀河酒店地下20號舖

電話:8883 5116