新濠鋒酒店(吉良Kira)的自助餐

去澳門,要食自助餐,第一間就諗起佢--吉良.$628一位,食物選擇不多,但係其出品絕大部份都不錯.生蠔新鮮,又爽又甜,魚生肥美,龍蝦用醬來焗,更加鮮味,比起白灼更加有FEEL.

每次黎都會送些貴一點點既食物,如今次就送鮑魚天婦羅,脆漿夠夠薄,鮑魚爽口,炸得出色喔~~

亦有即叫即整既鐵板燒系列,水準比起我之前試過那次更佳(上次OVERCOOKED).另外有海膽壽司,今次既味道就差左,可能食材唔夠靚.

鵝肝厚切入口即溶又係無得頂~不過無飲品任飲是遺憾(其實加錢可以的,但要加$180...)

吉良Kira

地址:氹仔舊城區廣東大馬路新濠鋒酒店10樓

電話:(853)88036633

價錢

晚餐放題(18:00-22:00)

$628

港麗酒店Conrad的樂聚廊Lobby Lounge

今晚食點健康的~名字叫燒牛肉芝士法包,材料有燒牛肉,芝士和法包~薄薄的半生熟燒牛肉層層疊和傑克芝士夾在法包中,燒牛肉既調味略淡,食到既就是純正既燒牛肉味道,又夠嫩~雖然話淡,但係沐點GRAVY係上面,又變左重口味.點解話健康?因為有幾塊葉係隔離囉...

樂聚廊 Lobby Lounge 

地址:金鐘金鐘道88號太古廣場港麗酒店大堂 

電話:2521 3838 內線 8250

帝京酒店的自助餐

黎到帝京酒店花月庭食自助餐,最美味既食物係海南雞飯. 飯粒煙韌重雞味,而且不太油膩,雞肉嫩滑有彈性,連辣醬都係充滿誠意.少少一碟就已經打贏其他食物.(其他食物味道只是一般)難怪連美女廚神KIT MAK都推介~雖然如此,但係全城海南雞飯第一名,點樣都係GRAND HYATT. 

海鮮冷盤沒有蟹腳,幸好有生蠔補數~味道幾CREAMY.但我不愛美國蠔,所以只是輕嚐4隻. 不過進食環境唔算太理想,客人超多,地方亦比較迫.....每個搵食位置都要排一條短隊.

花月庭 La Scala

地址:旺角太子道西193號帝京酒店2樓

電話:2622 6154

價錢

新葡京酒店Grand Lisboa Hotel的粥麵莊 Noodle & Congee Corner

一碗麵得一條麵都可以食得飽,方法只有一個,就係條麵超長.終於比我搵到了,就係開係新葡京酒店既粥麵莊.呢款麵叫一根麵,湯底可選豬,牛同酸辣.ORDER後見到師傅即時拉出一條唔斷既麵,真在有心思.麵質就係比較清爽,最愛呢有韌度既麵!

湯頭我就簡左牛,飲落就係好似台灣牛肉麵那種湯,濃濃的牛香,帶著一丁點藥材味.$65蚊一碗,包一款配料,加$5蚊再多一款,都算抵食~仲可以一路欣賞別人玩百家樂一注幾萬蚊既樂趣,實在賞心悅目!

粥麵莊 Noodle & Congee Corner

地址:南灣葡京路新葡京酒店1樓上層

電話:853 8803 7755