城市花園酒店的自助餐

去完痛苦廈門之旅,即刻約朋友食餐痛快既,係屋企附近既自助餐基本上選擇唔多,除左誠哥海逸外,就有城市花園既綠茵閣,我都好似成2年無黎過,係時候回味下

print定張coupon68折就緊嫁啦,原價$428加1,68折後連加1每人$334.有樣野又要讚下自己,雖然全場爆滿,好在book位時話要卡位,即時爽左

海鮮類有長腳蟹,青口藍青口,蝦,螺同蜆,長腳蟹鮮甜肉帶濕度,不過咸,食了好多件,亦係回本之選吧,青口好大隻,同樣係好甜,來貨唔錯,藍青口即時被比下去.蜆既味道很淡,螺就彈牙無沙,但係長腳蟹當前還是不食為妙.蝦都好新鮮,亦有少少膏,但size比起以前黎細隻左不少,以前黎呢度食勁食蝦,因為真係好新鮮大隻

剌身類三文魚同帶子必食,三文魚分得大方,很滑,魚味濃,帶子原粒上,同樣係鮮味無渣,最重要係比得大方,唔係放題o個款一開幾片

今餐最心動既係燒烤類食物,雞翼燒得出色,調味簡單以醬汁同蜜糖之類燒出,皮很重味,肉不鞋,帶少少燒烤香氣,食到不停口,共食左6隻雖然自助餐食雞翼好似唔太化算,但係對於我一年食幾十餐自助餐既我,尋找味道才是真理,粟米燒得略為乾,但係醬汁同樣美味,燒牛肉雖然無overcooked,但係都係幾鞋,可能太厚了.豬肉條味道好似貢丸,不太討好,始終都是雞翼好

羊架都唔錯,接近全熟,但肉味香濃,亦不鞋口,黑椒味帶起羊味,但7成熟比較好,始終煮咁熟唔太嫩滑

自助餐拎酥皮湯又係一蠢事,其實只係忌廉湯,煮得算係creamy,但材料略為簡單,蟹肉份量好少,我重以為好多料,btw味道不差

熟食類有樣野我都幾欣賞,就係胡椒蝦,胡椒味很重,十分傳神,炒得夠脆身,蝦肉爽彈咸度適中,十分滿意

係咁食雞翼,真霸氣

順帶一提呢度汽水果汁啤酒茶任飲,但要自己拎

食食下送上大蝦,以忌廉汁之類焗,但我既味蕾已被胡椒蝦同燒雞翼覆蓋,即係佔領利環,所以覺得淡左一點,我建設你送一隻咁大隻既避風堂style大蝦,我會更喜愛

食完大堆肉,食番沙律菜,自己加2件豬頸肉同食更有型,豬頸肉都係帶蜜糖香,夠哂肥,脂肪彈牙美味

日式蒸蛋用左味令蜆同埋昆布黎整,蛋汁香甜,滑度一般,以自助餐角度都算唔錯

朋友係咁食甜品,我就無興趣,只係見到macaron食番件,質素都唔求其,面頭少少脆,咬落好煙韌,但餡料簡單左一點

 食到尾仲隊左燒蝦同貝,味道不過不失,可能因為太飽,對味道不太敏感了,最後食埋生果就走人,食唔足3粒鐘,呢度有m字雪糕.但太飽了.....

整體食物質素不差,雖選擇不多,但燒烤類食物幾好,同埋任飲夠大方.但最緊要地方近我

綠茵閣Garden Cafe

地址:北角城市花園道9號城市花園酒店1樓

電話:28064922

價錢

LUNCH BUFFET(12:00-14:30)

星期一至五:成人$218/小童$178

星期六,日,公眾假期及前夕:成人$248/小童$208

DINNER BUFFET(18:30-21:30)

星期一至四:成人$428/小童$308

星期五至日,公眾假期及前夕:成人$458/小童$328